மே 13 விடுமுறை தினம் என்பதால்.. நானும் நண்பனும் எதாவது படத்துக்கு போகலாம் என்று கிளம்பினோம். எங்களை பொறுத்தவரை என்ன படம் என்பது முக்கியம் இல்லை.. தியேட்டர் தான் முக்கியம்.. போவது ஏ/சி தியேட்டராக இருந்தால் மட்டும் போதாது ஏ/சி போடும் தியேட்டராக இருக்க வேண்டும் என்பது முடிவு.. சென்னை வெயிலில் வதங்கும் நல்ல உள்ளங்கள் பலர் இந்த முடிவை ஆமோதிப்பார்கள்.

மாயாஜால் கிளம்பினோம்.. அடிக்கும் வெயிலில் அனிமல்ஸ் கூட வெளியில் வர வில்லை போல.. அங்கங்கே காதலர்கள் மட்டும் சென்று கொண்டு இருந்தார்கள்.. அதுவும் வழக்கத்தை விட கம்மி..

ஒரு வழியாய் அங்கே போய் சேர்ந்தோம்.. பைக் பார்கிங் பத்து ரூபாய்.. வெயிலில் தான் நிறுத்தவேண்டும்.. என் பைக் ரொம்ப பாவம்..ஏன்னா அதுக்கு இந்த வெயில் எல்லாம் பழக்கம் கிடையாது.. கோவைல ஹாயா இருந்துச்சு.. இங்க கொண்டு வந்து நூடுல்ஸ் ஆக்கறேன்… அதுக்கு வாய் இருந்தா “இதுக்கா டா என்ன உங்க அண்ணன் கிட்ட இருந்து தத்து எடுத்துட்டு வந்தனு” கத்தும்..
மதியம் மூணு மணிக்கு போய் சேந்தோம்.. அந்த நேரத்துக்கு எந்த படமும் அங்க இல்ல.. சரி 4:45 PM க்கு பசங்க இருக்கு.. வீட்டுக்கு போனாலும் டி.வி தான் பாக்கணும்.. அதை இங்க ஏ/சில பாப்போம் னு முடிவு செஞ்சு டிக்கெட் வாங்கி உள்ளே போனோம்..

அங்க பிக் ஸ்க்ரீன்ல சன் மியூசிக் ஓடுச்சு.. பொழுது போகாம அதுல வர எஸ் எம் எஸ் படிச்சு டைம் பாஸ் பண்ணினோம்..

அங்க இருந்த ஒன்னு ரெண்டு கன்னிகள (அதான் பிகர் னு சொல்லுவாங்க இல்ல.. ) பாத்தோம்.. அந்த கன்னிகள் கூட இருந்த ‘கண்ணி’யவான்கள் என்னை முறைத்திருக்கனும்.. நான் தான் அவங்கள பாக்கவே இல்லையே அதனால சரியா தெரியல..
 
சரி படம் எப்படி இருந்தது னு தான கேக்கறீங்க?? படம் கலக்கல்.. இந்த படத்துக்கு விமர்சனம் எழுதாம இருப்பது அந்த படத்துக்கு நான் செய்யும் மரியாதை.. இயக்குனர் புதுவரவாம்.. நல்வரவு..

படத்தில் ரொம்ப பிடித்தது:
 

1. அந்த குழந்தைகள், அவர்கள் நடிப்பு. அவர்கள் நடித்தார்களா இல்லை இப்படி தான் ஷூடிங்கில் சண்டை போட்டார்களா என்ற சந்தேகம் இப்பவும் உண்டு..
2. ஒரு சில இடங்களை தவிர, குழந்தைகள் குழந்தைகளாய் இருப்பது. அவர்கள் வயதுக்குரிய முதிர்ச்சியுடன் நடந்து கொள்வது மிக அழகு. பல படங்களில் குழந்தை நட்சத்திரம் வயதிற்கு மீறிய அறிவுடன் நடந்து கொள்ளும் (உதாரணம் : கன்னத்தில் முத்தமிட்டால்)..
3. இயல்பான திரைக்கதை.. தேவை இல்லாத ட்விஸ்ட் எல்லாம் இல்லை.. வீணாக படம் பார்பவர்களை பரபரப்பு ஆக்க எல்லாம் முயற்சிக்கவில்லை..
4. வேகா.. ச’ரோஜா’ இந்த படத்தில் கரிசகாட்டு பூவாக மலர்ந்திருக்கிறார். இவர் சமந்தப்பட்ட காதல் காட்சிகள் எல்லாம் சூப்பர்.. அந்த பையனும் (பேரு தெரியல) நல்லா நடித்திருக்கிறார்..
5. செல் போன் ரிங் டோன் வைத்து காதல் காட்சிகளை நகர்த்தியிருப்பது அருமை..
6. குறிப்பாக அந்த கிளைமாக்ஸ்.. காதலர்கள் ஓடுவதும் ஊர் மக்கள் துரத்துவதும் செம சேசிங்.. (இது எல்லா படத்திலும் தானே வருதுனு சொல்லறவங்க படம் பாத்துட்டு சொல்லுங்க ஹி ஹி !!)
7. கேமரா, ஒளிப்பதிவு, இசை, மற்ற நடிகர்கள்னு சொல்லீட்டே போகலாம்..

குறை:
ஒரு நல்ல படம் எடுத்தா அதில் குறை கண்டு’பிடிப்பது’ எனக்கு பிடிப்பதில்லை..

மொத்தத்தில் பசங்க – புள்ள குட்டியோட பாருங்க.